जनासी तारक विठ्ठलचि एक ।
केलासे विवेक सनकादिकीं ॥ १ ॥
तें रूप वोळले पंढरीस देखा ।
द्वैताची पै शाखा तोडीयेली ॥ २ ॥
उगवलें बिंब अद्वैत स्वयंभ ।
नाम हें सुलभ विठ्ठलराज ॥ ३ ॥
निवृत्तीचें गूज विठ्ठल सहज ।
गयनीराजें मज सांगितलें ॥ ४ ॥

सरलार्थ:

सर्व लोकांना संसार सागरातून तारणारा एक श्रीहरि विठ्ठलच आहे. असा विचार सनकादिकांनी पूर्वीच करून ठेवला आहे. ।।१।। ते पांडूरंगाचे रूप पंढरीस आले आहे व त्याने द्वैत व अद्वैताचे पंथ तोडून टाकले आहे. ।।२।। द्वैता द्वैतातीत स्वयंभू शुद्ध अद्वैताचा आकार उदयास आला आहे व त्याचे श्रीविठ्ठल हे साधे, सोपे, सुलभ नाम होय. ।।३।। श्रीविठ्ठल हे निवृत्तिचे निजगुज-जीवाहुनही अति प्रिय असे असुन हे विठ्ठल खेचरा स्वरूप सहजच आहे. ते गुज सद्‌गुरु गहिनीराज सद्‌गुरूंनी मला सहज सोपे करून सांगितले आहे. ।।४।।

भावार्थ:

सनकादिक संतांनी विचार मंथनातुन जो विचार सांगतिला त्या प्रमाणे एक विठ्ठलच जगतासी तारक आहे. संत ह्याला विवेक म्हणतात. तो श्री विठ्ठल आपले अद्वैत असे निर्गुण रुप सोडुन इकडे सगुण रुपात आकारला आहे. ज्या सुलभते नित्य सुर्यबिंब उगवते तेवढ्याच सुलभतेने त्याचे नाम प्रगट होते. निवृत्तिनाथ म्हणतात श्री गयनीनाथ कृपे मुळे नाम सुलभ आहे हे गुज मला कळले.