अकर्ता पैं कर्ता नाही यासी सत्ता ।
आपण तत्वता स्वयें असे ॥ १ ॥
तें रूप चोखाळ कृष्णनामें बिंबे ।
यशोदा सुलभें गीतीं गाय ॥ २ ॥
व्योमाकार ठसा नभीं दशदिशा ।
त्यामाजि आकाशा अवकाश होय ॥ ३ ॥
निवृत्ति म्हणे गुरु माझा पूर्ण ब्रह्म ।
उपदेश सुगम कृष्णनाम ॥ ४ ॥

सरलार्थ:

स्वत: अकर्ता असूनहि जगत्कल्याणाकरिता कर्ता होणे व स्वतः सर्व जगाचा आधार-सत्ता असूनहि स्वतः सत्तारहित असणे व तत्त्वत्तः सर्व आपण स्वत:च तो आहे ।।१।। असे ते शुद्ध स्वरूप कृष्णरूपाने साकार झाले आहे व यशोदा सहज रीतिने त्याचे गुण गात आहे. आकाशाच्या आकाराचा शिक्का आकाशांत दाही दिशेने आकाशाची पोकळी रूपाने जो अव्यक्त-निराकार आहे ।।३।। ते पूर्ण ब्रह्मच माझे पूर्ण गुरु असून त्याने मला कृष्ण या नामाचा सुलभ-सोपा उपदेश केला आहे. असे निवृत्तिनाथ म्हणतात ।।४।।

भावार्थ:

तो अकर्ता असला तरी त्याच्या सत्ते शिवाय काही होत नाही. एकटे म्हणावे तर तो चराचरात अशांत्मक स्वरुपात जाणवतो. त्या अरुप परमात्म्याचे कृष्णस्वरुपात नाम दर्शन होते व त्याला माता यशोदा अंगाई गाते. त्या आकाशाच्या आत दशदिशेला फाकलेले चिदाकाश आहे. आकाशाने पोकळ होऊन त्या चिदाकाशाला पोटात धरले आहे. निवृत्तिनाथ म्हणतात ब्रह्मस्वरुपाला प्राप्त असलेल्या श्री गुरु मुळे ते कृष्णनाम मला सोपे व सुलभ झाले.