सारासार धीर निर्गुण परतें ।
सादृश्य पुरतें हरिनाम ॥१॥
तें हें कृष्णनाम यशोदेच्या घरीं ।
वनीं गायी चारी यमुने तटीं ॥२॥
सुलभ सुभग आगमनिगम ।
तो हा आत्माराम गोपवेषें ॥३॥
निवृत्तीचे पार गयनीचें गुज ।
मज मंत्रबीज उपदेशिलें ॥४॥

सरलार्थ:

त्रिगुण असार निर्गुण हे सार व त्या साराचे सार, निर्विकार, अर्थातच निर्गुण स्वरूपाच्याहि पलिकडचे हे हरिरूप पूर्णपणे साकार झाले आहे ।।१।। व ते कृष्णरूपात यशोदेच्या घरी आले असून यमुनेच्या तीरावर रानावनांत गायी चारीत आहे ।।२।। सोपे, सौभाग्यपूर्ण तो वेद व शास्त्रोक्त वर्णिलेला आत्माराम परमात्मा गवळ्याच्या वेषात नांदत आहे ।।३।। निवृत्तिचे अंतिम साध्य व गहिनी नाथांचे गुप्तगुह्य असून त्याचाच मला त्यांनी उपदेश केला आहे ।।४।।

भावार्थ:

सर्व चराचर अस्थिर आहे त्यात स्थित्यंतर होत असते त्यात परब्रह्म फक्त स्थिर आहे. त्या सादृश्य गुणातीत परमात्म्याचे नामच परिपूर्ण आहे. तेच परब्रह्म यशोदामातेच्या घरातील गायी यमुने तीरी चारत आहे. सर्वांना अगम्य असणारा हा परमात्मा मात्र गोपाळांशी सोपा झाला व गोपवेशे धरुन त्यांच्यात वावरु लागला निवृत्तिनाथ म्हणतात सर्वा पलिकडे असणारे ते ब्रह्म नाम मंत्राच्या आधारे प्राप्त करुन घेण्याचे गुज गौप्य श्री गुरु गहिनीनाथांमुळे मला प्राप्त झाले.