नसे तो ब्रह्मांडी नसे तो वैकुंठीं ।
दुजियाची गोष्टी नाहीं तेथें ॥१॥
तें रूप सुंदर देवकी उदरीं ।
वसुदेव घरीं कृष्ण माझा ॥२॥
ब्रह्मांडकडवा मनाचा वोणवा ।
साधितां राणिवा हारपती ॥३॥
निवृत्ति सुंदर कृष्णरूप सेवी ।
गयनीगोसावी उपदेशिलें ॥४॥

सरलार्थ:

तो परब्रह्म परमात्मा ब्रह्मांडात व वैकुंठातहि नाही. व दुसरेपणाचे तर तेथे नांवच नाही ।।१।। ते सुंदर रूप देवकीच्या उदरात व वसुदेवाच्या घरी माझ्या कृष्णाच्या रूपात आहे ।।२।। ब्रह्मांडाला निष्ठुर व मनाचा तर अग्नीच व ज्याला साध्य करण्याचा प्रयत्न केला असता मोठमोठी राज्ये नाहिसी झाली ।।३।। निवृत्तिनाथ ते सुंदर कृष्णरूप सेवन करीत आहे. जे गहिनीनाथांनी उपदेशिले आहे ।।४।।

भावार्थ:

जो परमात्मा ब्रह्मांड व बैकुळात नाही तो परमात्मा सर्वत्र व्यापक स्वरुपात ओतप्रोत भरला आहे. तेच सुंदर रूप कृष्ण होऊन देवकीच्या पोटी व वसुदेवाच्या तुरुंगात म्हणजे तो आल्याने झालेल्या घरात अवतिर्ण झाले. तो परमात्मा ब्रह्मांड व मनाला परे असुन तो मनाच्या जाणिवा पासुन दुर आहे. निवृत्तिनाथ म्हणतात गोसावी गहिनीनाथांनी उपदेशामुळे मला ते कृष्ण रूप भोगता आले.