न साधे योगी न संपडे जगीं ।
तें नंदाच्या उत्संगी खेळें रूप ॥ १ ॥
कृष्ण माझा हरी खेळतो गोकुळीं ।
गोपिका सकळीं वेढियेला ॥ २ ॥
गाईचे कळप गोपाळ अमुप ।
खेळतसे दीप वैकुंठीचा ॥ ३ ॥
निवृत्ति दीपडें वैकुंठें साबडें ।
यशोदामाये कोडें चुंबन देत ॥ ४ ॥

सरलार्थ:

जो योग्यांना प्राप्त होत नाही व जगात कोठेच सापडत नाही तो नंदाच्या पदरांत मांडीवर खेळत आहे ।।१।। तो माझा श्रीहरि कृष्ण गोकुळांत खेळत आहे व त्याला सर्व गोपींनी वेढुन घेतले आहे ।।२।। गाईंचे मोठमोठे कळप व असंख्य गोपाळ यांच्यामध्ये तो वैकुंठीचा प्रकाशमान दीप खेळत आहे ।।३।। निवृत्तिचा हा नंदादीप शुद्ध वैकुंठस्वरूप श्रीहरि यशोदामातेला कौतुकाने चुंबन देत आहे ।।४।।

भावार्थ:

जे ब्रह्मस्वरुप योग्यांच्यां ध्यानात सापडत नाही जे जगाला दिसत नाही ते नंदाच्या मांडीवर खेळत आहे. तोच माझा हरि गोकुळात कृष्ण बनुन खेळत आहे व त्यांने सर्व गोपिका नादावल्या आहेत. तो वैकुंठीचा दिप गाईंचे कळप घेऊन गवळ्यांसोबत खेळत आहे. निवृत्तिनाथ म्हणतात, मला ज्ञानप्रकाश देणारा निरागस कृष्ण माता यशोदेचे प्रेमाने चुंबन घेतो.