ज्या रूपाकारणें देव वोळंगणे ।
योगी गुरुखुणें सेविताती ॥ १ ॥
ते रूप गोकुळीं गोपाळांचे मेळीं ।
अखंड त्यामेळीं खेळतुसे ॥ २ ॥
ब्रह्मांड कडोविकडी ब्रह्मांड घडी ।
या योग परवडी हरपती ॥ ३ ॥
निवृत्तीचे धन ब्रह्म हें रोकडें ।
गौळणी त्यापुढें खेळविती ॥ ४ ॥

सरलार्थ:

ज्या रूपासाठी स्वर्गीय देव देखील शरणांगती करतात व योगीलोक गुरूंनी सांगितलेल्या वर्माचे सेवन करतात ।।१।। ते रूप गोकुळांत गोपाळांच्या संगतीने अखंड समुदायाने खेळत आहे ।।२।। ब्रह्मांडाची व्यवस्थित रचना हे योगाचे प्रकार जेथे नाहिसे होतात ।। ३।। हा नंदाचा गोपालकृष्ण निवृत्तीचा तारक आहे, यशोदा व देवकीस झालेला हा मोठा लाभ आहे ।।४।।

भावार्थ:

त्या ब्रह्मस्वरुपाचे चिंतन किंवा नामरुप सेवा देवादिक व योगी आपल्या गुरुकृपेने करतात.तेच परब्रह्म गोकुळात त्या गोपाळांबरोबर अखंड खेळत आहे.ते ब्रह्मस्वरुप अनेक ब्रह्मांड घडवत व मोडत असते ते नुसते ऐकुन योगी भान हरपुन जातात. निवृतिनाथ म्हणतात, ज्याला गौवळणी आपल्या पुढ्यात खेळवतात तेच माझे महाधन परब्रह्म आहे.