हरि आत्मा होय परात्पर आलें ।
नाम हें क्षरलें वेदमतें ॥ १ ॥
वेदांतसिद्धांत नाहीं आनुहेत ।
सर्वभूतीं हेत हरि आहे ॥ २ ॥
हरिवि न दिसे गुरु सांगतसे ।
हरि हा प्रकाशे सर्व रुपीं ॥ ३ ॥
निवृत्तिनें कोंदले सद्‌गुरूंनीं दिधलें ।
हरिधन भलें आम्हां माजी ॥ ४ ॥

सरलार्थ:

आत्मा हा हरिस्वरूप झाला असता प्रकृतिच्याहि पलिकडे असलेला परमात्मा प्राप्त होतो व त्यातून भगवंताचे नाम प्रगट होते असे वेदाचे मत आहे ।।१।। वेदांताच्या सिद्धांताचा दुसरा आशय नाही. सर्वाभूती एक श्रीहरि आहे हाच त्याचा विचार आहे ||२|| हरि वांचुन दुसरे कांहीच दिसत नाही असे श्रीगुरू सांगतात. सर्वरूपाने हरिचाच प्रकाश आहे ।।३।।

भावार्थ:

आत्मतत्व हेच हरिरुप आहे व आत्मा व हरि हे परात्पर आहेत त्याच हरिचे नाम ही त्याच्या रुपा सारखे अनंत स्वरुप आहे असे वेद सांगतात. सर्वामध्ये तो हरि आहे हा वेदाचा एकमेव हेतु व सिध्दांत आहे. श्री गुरुनी सांगितल्या प्रमाणे तो हरिच मला सर्व पदार्थात दिसतो व तोच हरि ज्ञानप्रकाश बनुन आला आहे. निवृतिनाथ म्हणतात, श्री गुरु गहिनीनाथांनी हे ज्ञान दिल्यामुळे तेच आमचे नामधन आम्हामध्ये भरले आहे.