२०८ खुंटलें तें मन तोडियेली गति

खुंटलें तें मन तोडियेली गति ।
वेळु तो पुढती मोडियला ॥ १ ॥
जाहालें उन्मन विरालें तें मन ।
श्रीरामचरण पुरे आम्हां ॥ २ ॥
गेलें मन रामीं निष्काम कल्पना ।
बुडाली वासना तिये डोही ॥ ३ ॥
धन्य ते चरण नित्यता स्मरण ।
अखंडसंपन्न प्रेम देतु ॥ ४ ॥
अमृत कुपिका अमृताचा झरा ।
पटु येकसरा वाहातुसे ॥ ५ ॥
निवृत्तीची वृत्ति प्रेमेंचि डुल्लत ।
नमनेम निश्चित रामपायीं ॥ ६ ॥

सरलार्थ:

आता आमचे मन कुंठित झाले असून त्याचा वेग तोडून टाकला आहे. व त्याच्या संकल्पाचा पुढील वेल नष्ट केला आहे ।।१।। ते मन उन्मन – मनरहित झाले असून मनपणाने ते विरून गेले आहे. व आता आम्हाला श्रीरामाचे चरणच पुरे आहे ।।२।। आमचे मन रामस्वरूपांत गेले असून ते कल्पनारहित निष्काम झाले आहे व त्या श्रीहरिच्या स्वरूप डोहात वासना समूळ बुजली आहे ।।३।। ते चरण धन्य आहेत. त्यांचे नित्य स्मरण केले असता ते अखंड व संपन्न असे प्रेम देतात ।।४।।

भावार्थ:

आम्ही आत्मारामशी जोडलो गेल्याने मनाची धाव खुंटली त्याची गती निमाली व वेळेचे बंधन ही राहिले नाही.त्या श्रीराम चरणाला विनटल्यापासुन मन उन्मन झाले. मनात राम बसल्यावर कल्पना निष्काम झाली व वा़सना ठायीच बुडुन गेली. त्या रामचरणाचे नित्य स्मरण केल्याने धन्यता मिळाली व अखंड प्रेमाचा झरा हृदयात वाहु लागला. रामनामामुळे अमृताची कुपीका हाती आली व तो अमृत झरा प्रेमपाटातुन सतत वाहता झाला.निवृत्तिनाथ म्हणतात मी रामनामाच्या मुळे प्रेमाने डुल्लत आहे त्यामुळे त्या श्रीराम पायावर मी विनटलो आहे.

Leave a Reply 0

Your email address will not be published. Required fields are marked *