१६. नमो गणपति गजानना

नमो गणपति गजानना । नमो सरस्वति मंगलध्याना ।
नमो अगाध ब्रह्मपरायणा । नमो नमो स्वामी ॥ १ ॥
नमो आदिमायादि सागरा । नमो चिदानंद दिगंबरा ।
एकत्त्व एक सारा । नमो नमो तुज ॥ २ ॥
नमो मत्स्येंद्रनाथा अनादी । नमो सर्वव्यापका बुद्धी ।
नमो जुनाट युगादी । तुज नमो ॥ ३ ॥
नमो सत्यकाळनाथ त्रिगती । नमो पुढत पुढती ।
योगेश्वरा आदिअंती । नमो नमो स्वामी ॥ ४ ॥
नमो गहिनीनाथ अविनाशा । नमो सहजासहज प्रकाशा ।
नमो व्यापुनि दाही दिशा। आदि गुरू तुज नमो ॥ ५॥
गुप्तनाथ तुज नमन । नमो सद्गुरू परब्रह्म पूर्ण ।
सदा स्वरूपी अनुसंधान । नमस्ते नमस्ते ।। ६ ।।
नमो गहिनीनाथा आदिगुरू। तूं संकटीं आदि तारूं ।
नमो संसारहर्ता हरू । सद्गुरूनाथा तुज नमो ॥ ७॥
नमो कर्ता हर्ता नारायणा । नमो उदयो अस्तु गगनघना ।
नमो विराटपुरुषा जगज्जीवना । नमस्ते नमस्ते कुळस्वामी ॥ ८ ॥
नमो त्रिपुटी गुप्तधना । नीलवर्णा कलंकी कोंदणा ।
नमो ज्योतिर्मय दारुणा । नमो नमो जगद्गुरू ॥ ९ ॥
नमो पांडुरंग दयाळा । नमो गोविंदा गोपाळा ।
नमो वैष्णवा सकळां । योगियां ऋषीश्वरां नमो नमो ॥ १० ॥
नमो सर्व चराचर । नमो अंतरबाहेर ।
नमो दहाही अवतार । जगद्भूषणा तुज नमो ॥। ११ ॥
नमन नेणों कैसे रीती। नमन रंगले विश्वरूपी ।
नमन चिन्मय गुह्य गौप्यी । नमो सर्वा भूतीं निजगुरू ॥ १२ ॥