अद्वैत अमरकंदु हा घडला ।
ब्रह्मांडी संचला ब्रह्मासाचें ॥१॥
तें रूप कारण कृष्ण तेजाकार ।
सर्व हा आकार त्याचा असे ॥२॥
विराट विनटु विराट दिसतु ।
आपणचि होतु ब्रह्मसुख ॥३॥
निवृत्ति कोवळें आपण सोंविळें ।
त्यामाजी वोविलें मन माझें ॥४॥

सरलार्थ:

सर्व ब्रह्मांडांत व्यापून असलेले सत्य ब्रह्म आणि अद्वैत अमरत्वाचा मूळ कंदच आकारास आला आहे ।।१।। तेच हे तेजस्वरूप कृष्ण रूप आहे. हा सर्व सृष्टिचा आकार त्या कारण ब्रह्म स्वरूप श्रीकृष्णाचाच आहे ।।२।। ते विराट-फार मोठे व शोभिवंत रूप, विशाल रूपाने दिसत आहे. व आपणच सुखाने सहजच ब्रह्म होत आहे ।।३।। निवृत्तिनाथ म्हणतात – त्या मृदु-मऊ सोवळ्या शुद्ध ब्रह्मातच माझे मन गुंतुन ठेवले आहे ।।४।।

भावार्थ:

त्या ब्रह्मांडाला व्यापुन राहिलेली आपल्या अद्वैत व अमरत्वाने ब्रह्मत्व घेऊन आलेला हा जगताचा ठेवा आहे. जगताचे सर्व आकार आपल्या अंगे दाखवणारा हा जग निर्मिती करणारा कृष्णच आहे. अत्यंत विराटरुप जगतस्वरुपात निर्माण करणारा तेच विराट रुप आपल्या अंगात बाळगुन आहे. निवृत्तिनाथ म्हणतात, त्या पवित्र, कोवळ्या व सर्वापासुन वेगळ्या असणाऱ्या रुपाने माझे मन बांधले आहे.