व्याप्तरूपें थोर व्यापक अरूप ।
दुसरें स्वरूप नाहीं जेथें ॥१॥
तें अव्यक्त साबडें कृष्णाचें रूपडें ।
गोपाळ बागडें तन्मयता ॥२॥
उन्मनि माजिटें भोगिती ते मुनी ।
मुर्तिची पर्वणी ह्रदयीं वसे ॥३॥
निवृत्ति कारण कृष्ण हा परिपूर्ण ।
यशोदा पूर्णघन वोळलेंसे ॥४॥

सरलार्थ:

व्यापलेल्या जगाच्या रूपाने व व्यापणाऱ्या रूपरहित स्वरूपाने जेथे दुसरेपणाच नाही ।।१।। ते अव्यक्त-भोळेभाळे कृष्णरूप गोपाळामध्ये एकरूप होऊन खेळत आहे ।।२।। मुनिजन त्यास उन्मन अवस्थेमध्ये भोगतात व ती पवित्र मूर्ती त्यांच्या हृदयात राहते ।।३।। निवृत्तिनाथ म्हणतात तो जगत्कारण परिपूर्ण श्रीकृष्ण पूर्णत्त्वाने दाटला व यशोदेस प्रसन्न झाला आहे. ।।४।।

भावार्थ:

ज्या निर्गुणरुपाने सर्व जगत व्यापले आहे त्यारुपाच्या जागी दुसरे कोणतीही रुप नाही. त्याच रुपाने भाबडे सगुण कृष्णरुप धारण केले असुन ते गोपाळांत बागडत आहे. उन्मनी ह्या स्वरुप ज्ञानाच्या प्रकाराने मुनी त्या रुपाचा आनंद उपभोगुन ती कृष्णमूर्ती हृदयात स्थापित करतात. निवृत्तिनाथ म्हणतात, आपल्या कर्मामुळे हे कृष्ण हे रुप परिपूर्ण झाले आहे व ते रुप यशोदेचा पुत्र होऊन आल्या मुळे तिला महाधन प्राप्त झाले आहे.