कारण परिसणा कामधाम नेम ।
सर्वाआत्माराम नेमियेला ॥१॥
तें रूप सुंदर सर्वागोचर ।
कृष्ण परिकर गोपवेषे ॥२॥
वेदादिक कंद ॐकार उद्बोध ।
साकार प्रसिद्ध सर्वाघटीं ॥३॥
निवृत्ति म्हणे धाम कृष्ण हा परम ।
सौख्यरूपें सम वर्ततसे ॥४॥

सरलार्थ:

अरे बाबा ऐक जगाचे मूलतत्त्व व कामदेवाचे स्थानाचे लक्ष्य असलेला तो श्रीहरि ज्याचा सर्वांचा आत्माराम म्हणून निर्देश आहे ।।१।। ते सुंदर रूप सर्वांना दिसणारे पण आता गोकुळांत हा कृष्णाचा सर्व परिवार गोपवेषात वावरत आहे ।।२।। वेदशास्त्रांचा मूळ असलेला व ओंकाराचे प्रगटन असलेला सर्व घरामध्ये स्पष्टरूपे साकारलेला प्रसिद्ध असा परमात्मा ।।३।। श्रीकृष्ण श्रेष्ठ असे स्थान असून सुखरूपाने सर्वांचे ठिकाणी सारखाच वागत आहे असे निवृत्तीनाथ म्हणतात. ।।४।।

भावार्थ:

माझ्या सर्व इच्छा, सर्व कर्म, सर्व नित्यनेम हा तोच झाला असुन त्याच्याच मुळे मला आत्मभान स्वरुपात भगवंत जाणवला आहे. तेच कृष्णरुप सर्वांग सुंदर देखणे असुन गोकुळात अवतरुन सर्वाना प्राप्य आहे.सर्व वेदांचे सार जसे ॐकार प्रणवात एकवटले आहे. तसेच तो ॐकार त्या ब्रह्मस्वरुपातुन प्रतित होतो.निवृत्तिनाथ म्हणतात, तो भगवंत सर्व धामामध्ये संपुर्ण भरला असुन तो स्वानंद स्वरुपात सौख्य प्रदान करत असतो.