जेथें रूप रेखा नाहीं गुण देखा ।
चिदाकाश एका आपतत्त्व ॥१॥
तें रूप गोजिरें कृष्ण रूपें सांग ।
यशोदेचा पांग हरियेला ॥२॥
जेथें रजतम नाहीं तें निःसीम ।
अपशम दम पूर्णघन ॥३॥
निवृत्ति सार पा ब्रह्मसुख घन ।
सर्व जनार्दन गोपवेषें ॥४॥

सरलार्थ:

पहा ज्या चिदाकाशात कोणतीहि रूपरेषा सीमा व गुण नाही व केवळ आत्मतत्त्वाचे माप-ज्ञान आहे ।।१।। ते मनोहर रूप कृष्णरूपाने पूर्ण प्रगट होऊन त्याने यशोदेचे कष्ट नष्ट केले ।।२।। ज्या स्वरूपांत रज तम हे गुण नसून ते देश-काल-वस्तुमर्यादारहित असून आत्मत्वाने मन-इंद्रिये नियमना सह पूर्ण दाटून आहे ।।३।। साररूप व सर्वांचा शेवट असलेले ब्रह्मसुख निवृत्तिचे धन असून सर्व जनार्दन स्वरूप गवळ्याच्या वेषाने नटले आहे ।।४।।

भावार्थ:

त्या जीवनयुक्त पाण्याला जसे आकार, रुप, रेखा नसते तसे ते निर्गुण ब्रह्मस्वरुप चिदाकाशाला व्यापुन जगतात प्रतित होत आहे.त्याच ब्रह्मस्वरुपाने गोजिरे कृष्णरुप घेऊन यशोदेचे पुत्रत्व स्विकारल्या मुळे तिचे सर्व पांग फिटले आहेत. त्याच रुपाला सत्व रज तम ह्या गुणांचा वाराही लागलेला नसुन तितिक्षा ही नसलेले ते परिपुर्ण स्वरुप आहे. निवृत्तिनाथम्हणतात, सर्वांचे सार घेऊन ते ब्रह्म जनार्दन कृष्ण होऊन गोपवेशात आला आहे.