नेणो पैं द्वैत अवघेंचि अद्वैत ।
एकरूप मात करूं आम्हीं ॥ १ ॥
अवघाचि श्रीहरि नांदे घरोघरीं ।
दिसे चराचरीं ऐसे करा ॥ २ ॥
सेवावे चरण गुरुमूर्ति ध्यान ।
गयनि संपन्न ब्रह्मरसे ॥ ३ ॥
निवृत्ति चोखडा ब्रह्मरसु उघडा ।
गुरुकृपें निवाडा निवडिला ॥ ४ ॥

सरलार्थ:

आम्ही आता द्वैत जाणत नाही. कारण सर्वच अद्वैत आहे म्हणून आम्ही एकरूप अशा श्रीहरिचीच गोष्ट करू भाषा करू ।।१।। घरोघरी सर्वरूपाने एक श्रीहरिच नांदत आहे. तो सर्व चराचरविश्वात आम्हाला दिसेल असे करा ।।२।। गुरुचरणाची सेवा व गुरुंच्या मुर्तिचे ध्यान असल्याने गुरू गहिनी हे ब्रह्मानंदाने संपन्न श्रीमंत आहे ।।३।। तोच शुद्ध, ब्रह्मरस उघडपणे- प्रत्यक्ष निवृत्तिस प्राप्त झाला आहे गुरुकृपेने तो जगदुपाधितून निवडून काढला आहे ।।४।।

भावार्थ:

सर्वत्र तो परमात्मा कोणते ही द्वैत न ठेवता एकत्वाने भरला आहे. आम्ही त्या एकच रुपाचे वर्णन करु. सर्वत्र सर्व ठिकाणी तोच परमात्मा एकत्वाने भरुन राहिला आहे. श्री गुरु गहिनीनाथ ब्रह्मरसाने परिपूर्ण आहे. त्याच गुरुमूर्तीच्या चरणाची सेवा मी करतो. निवृत्तिनाथ म्हणतात, गुरुकृपे मुळे तो शुध्द ब्रह्मरस आम्हाला निवडुन घेता आला.