नाहीं छाया माया प्रकृतीच्या आया ।
मनाच्या उपाया न चले कांही ॥१॥
तें रूप स्वरूप अपार अमूप ।
यशोदे समीप खेळतसे ॥२॥
विश्वाचा विश्वास विश्वरूपाधीश ।
सर्वत्र महेश एकरूपें ॥३॥
निवृत्ति सर्वज्ञ नाममंत्रयज्ञ ।
सर्व हाचि पूर्ण आत्माराम ॥४॥

सरलार्थ:

परब्रह्मशक्तीच्या आकाराला सावली व माया सत्ता नाही व मनाचे मार्ग तेथे चालत नाहीत ।।१।। त्या रूपाचे स्वरूप अमर्याद व अमाप आहे. पण ते प्रेमाने यशोदेच्या जवळ खेळत आहे ।।२।। सर्वविश्वाची भावना व विश्वरुपाचा मालक असून सर्व ठिकाणी तो महान ईश्वर एकरुपाने आहे ।।३।। जाणत्या निवृत्तिचा हाच नाममंत्र यज्ञ आहे. हा आत्माराम सर्व ठिकाणी पूर्णत्त्वाने आहे. ।।४।।

भावार्थ:

ते परब्रम्ह ज्याला चारी हि शरिरे नाहीत त्यामुळे त्याची छाया ही नाही व शरिरच नसल्याने मायेला ही परे आहे. म्हणुन तेथे मनाचा ही उपाय चालत नाही. ते स्वरुप येवे विशाल आहे की त्याचे मोजमाप नाही होत ते स्वरुप यशोदे जवळ खेळते. तो परमात्मा नुसता जगाचा विश्वास नाही तर विश्वाचे रुपचे आहे. व तोच सर्वांचा महा देव आहे. निवृत्तिनाथ म्हणतात त्याच्या सर्व जगात पसरलेल्या स्वरुपाला मी कृष्णनामात पाहातो व सतत त्याचा जप करतो.