ज्ञानेंसि विज्ञास रूपेंसि सज्ञान ।
ध्यानेंसि धारणा हारपली ॥१॥
तें रूप संपूर्ण वोळलें हें खुण ।
नंदासी चिद्धन वर्षलासे ॥२॥
अरूप सरूप लक्षिता पै माप ।
नंदा दिव्य दीप उजळला ॥३॥
निवृत्ति संपूर्ण नामनारायण ।
सच्चिदानन्दघन सर्व सुखी ॥४॥

सरलार्थ:

जेथे ज्ञानासह विज्ञान म्हणजे विपरीत ज्ञान-प्रपंचज्ञान तसेच नामरूपासह ज्ञान ; ध्यानासह धारणा नाहिशी होते ।।१।। ते परमात्मस्वरूप सर्वांगाने येथे प्राप्त झाले. आनंदासह चिद्घनाचा वर्षावच झाला ।।२।। रूपरहित व रूपासह माप घेतले असता नंदाच्या घरी दिव्य दीप प्रगट झाला आहे ।।३।। निवृत्ति हा नारायणाच्या नामाने परिपूर्ण झाला आहे. त्या सच्चिदानंद स्वरुपानेच सर्व सुखरूप होतात ।।४।।

भावार्थ:

त्या स्वरुपाच्या ठिकाणी ईश्वर स्वरुपाचा निर्णय करणारे विज्ञानासहित स्वरुप सांगणारे स्वरुप ज्ञान व प्रकृतीच्या तत्वे सांगणारे सुक्ष्म ज्ञान ध्यानासह लयाला जाते. त्या परमात्म्याने नंदा घरी येऊन सर्वांवर चैतन्याचा वर्षाव केला, ज्याच्या अरुप स्वरुपा ला माप नाही तो प्रत्यक्ष नंदाकडे वंशरूप दिप होऊन तेवत आहे. निवृत्तिनाथ म्हणतात ह्या नारायण नामाचा जप केला तर सच्चिदानंद सहज प्राप्त होतो.