मेघ अमृताचा जेथूनि पवाड ।
दुजियाची चाड नाहीं तेथें ॥ १ ॥
तें रूप अरूप सुंदर सावळे ।
भोगिती गोवळे सुखसिंधु ॥ २ ॥
विराट नाटकु वैराज जुनाटु ।
गोपवेषें नटु नंदाघरीं ॥ ३ ॥
निवृत्ति सत्वर सेवि सुखसार ।
प्रकृति आकार लोपें ब्रह्मीं ॥ ४ ॥

सरलार्थ:

अमृत मेघाचा जेथून जोर आहे व दुसरेपणाची तेथे इच्छाच नाही ।।१।। ते रूपरहित रूप मनोवेधक व सावळ्या रंगाचे, सुखाचा सागरच असे गोकुळातील गवळी भोगत आहेत ।।२।। विराट-स्थूल सृष्टिच्या रूपाने नटणारा, सूक्ष्म असा हिरण्यगर्भ स्वरूप अतिजुनाच परमात्मा गोपाच्या रूपात नंदाच्या घरांत नटला आहे ।। ३ ।। निवृत्ति हा लगोलग ते सुखाचे हि सार असलेले कृष्णरूप सेवन करीत आहे. त्यामुळे या जगताच्या आकारब्रह्म स्वरूपांत विलीन होऊन जातो ।।४।।

भावार्थ:

तो परमात्मा प्रेमामृताचा मेघ होऊन गोकुळाच्या अवकाशात आला आहे. त्याला दुसऱ्या कोणाच्या सहाय्याची गरज नाही. तोच रुप रहित अमृतमय परमात्मा सुंदर सावळे कृष्णरुप घेऊन गोकुळात आल्याचे सुख सगळे भोगत आहेत. त्या विराट आशा परमात्माला कोणी जोड नसल्याने त्याचे राज्य सर्वत्र असते. तोच परमात्मा गोपवेशात नंदाघरी राहत आहे. निवृत्तिनाथ म्हणतात त्याच्या सुखरुप पणाचे प्रकृती, आकार विरहित रुप संत भोगतात.