आदीची अनादि मूळ पैं सर्वथा ।
परादि या कथा हारपती ॥ १ ॥
तें अव्यक्त रूप देवकीचें बाळ ।
वसुदेवकुळ कृष्णठसा ॥ २ ॥
मुरालीं ब्रह्मांडें अमितें पैं अंडें ।
ढिसाळ प्रचंडें जया माजी ॥ ३ ॥
निवृत्तीचें धन माजी तो श्रीकृष्ण ।
सांगितला प्रश्न गयनीराजें ॥ ४ ॥

सरलार्थ:

सर्व सृष्टिचा आदि खरा पण मुळात स्वतः आदि नसलेला-अनादि परमात्मा असून परा- पश्यन्ति आदि वाणींची गोष्ट ही नाहिसी होते ।।१।। ते अव्यक्त, अप्रगट असे स्वरूप देवकीचे बाळ व वसुदेवाच्या कुळांत कृष्ण रूपाने मूर्त झाले आहे ।।२।। असंख्य महान व विशाल अशी ब्रह्मांडे ज्याच्या व्यापक स्वरूपांत विलीन झाली आहेत ।।३।। तो श्रीकृष्णच आपले धन असे निवृत्ति मानतो व हाच विचार सद्गुरु गहिनीरायांनी सांगितला आहे ।।४।।

भावार्थ:

तो परमात्मा सर्वंचे अनादि मूळ आहे. परा पश्यंती मध्यमा वैखरी सारखे ह्याचे वर्णन करताना हरपून जातात. तोच निर्गुण परमात्मा श्रीकृष्ण नामाची मुद्रा लाऊन देवकी वसुदेवाच्या कुळी जन्माला आला. त्या परमात्मरुपात अनेक ब्रह्मांडे लयाला जातात व अनेक नविन ब्रह्मांडांचे बीजारोपण होते. निवृत्तिनाथ म्हणतात, मी जेंव्हा गहिनीनाथांना विचारले की मुळ ठेवा कोणता तेंव्हा त्यांनी सांगितले माझा श्रीकृष्ण हाच मुळ ठेवा आहे.